Халықаралық балалар кітабы апталығы аясында

• 2 маусым 2026
• Оқылған саны: 1556

Биылғы жылдың 1 сәуір күні Ақтау қаласы 11 шағын аудан 16 үйде №2 қалалық балалар кітапханасының салтанатты ашылу рәсімі өтті. Айрықша маңызға ие мәдени шараға Ақтау қаласы әкімінің орынбасары Бекзат Жүсіп, белгілі сатирик-жазушы, сазгер Ерекен Қорабаев, балалар ақыны әрі композитор Көмек Ыбырайұлы, сондай-ақ зиялы қауым өкілдері мен жас оқырмандар қатысты.

Іс-шара барысында мектеп оқушылары өнерлерін ортаға салып, күй тартып, көркемсөз оқу арқылы өз шеберліктерін паш етті. Жас дарындардың өнері қонақтарға ерекше әсер сыйлап, мерекелік көңіл-күй қалыптастырды. Кітапхана қонақтары үшін арнайы ұйымдастырылған «Бір ел–бір кітап», «Жаңа кітаптар», «Мерейтой иелері», «Маңғыстау - дала рухының мекені», «Қазақстан – тарих пен тағылым» атты кітап көрмелері таныстырылып, көпшілік назарына ұсынылды.

Балалар кітапханасының кеңістігі толық жабдықталған. Мұнда балаларға арналған оқу залы, шығармашылық және танымдық іс-шаралар өткізуге арналған кеңістік, сондай-ақ ата-аналарға арналған арнайы бұрыш қарастырылған. 

Жаңа кітапхана филиалының ашылуы балалар мен жасөспірімдердің бос уақытын тиімді ұйымдастыруға кең мүмкіндік береді.